منتديات كايتو كيد
المواضيع الأخيرة

شاطر
استعرض الموضوع السابقاذهب الى الأسفلاستعرض الموضوع التالي
avatar
EL-Mo7akik
لص جديد
لص جديد
ذكر
الشخصية المفضلة : كونان إيدوجاوا
عدد المساهمات : 32
المبلغ الخاص بك : 42
البلد :
  :

من اكبر قصص الرعب البيت المسحور الجزء 1.2.3

في الثلاثاء 16 يونيو 2015 - 18:06
الجزء الأول
رن تليفونى المحمول برنة صحتنى من سابع نومة وكعادتى الى خلت الناس كلها تكرهنى انى ما بردش على ارقام غريبة

فضل الرقم يرن مرة و اتنين و عشرة و الف لحد ما قررت انى ارد على الى بيتصل

الو

صباح الخير يا اسلام

صباح النور مين

انا سلمى

سلمى مين

سلمى صالح يا اسلام صح النوم

آه ازيك يا سلمى عاملة ايه

الحمد لله انت اخبارك ايه

انا كويس الحمد لله

بقول لك يا اسلام انا عايزة منك خدمه

اؤمرينى يا سلمى

فى واحدة صاحبتى اسمها آيه بيحصل لها حاجات غريبة فى البيت عندهم هى و باباها و مامتها واخواتها

( وكن قرون استشعار ما وراء الطبيعه لفتت انتباهى و بدات اشعر بالتركيز )

قولت لها تمام و بعدين

قالت لى هى محتاجه مساعدتك فى الموضوع ده

وطبعا هى كانت بتقول كدة وهى واثقه انى هوافق لانها عارفة كويس اوى انى اعشق هذا العالم

جاوبت بلموافقه طبعا و قولت  اكيد طببعا يا سلمى

قالت لى تمام يناسبك نتقابل امتى

قولتلها لو يناسب صاحبتك كمان ساعتين

فين

فى نفس لمكان يا سلمى

وطبعا هنا سلمي فهمت ان نفس المكان هو الكافيه الى بعشق وجودى فيه

قالت لى تمام اتفقنا

 

 قومت من عالسرير وانا استشعر وجود  مغامره جديده ورا مكالمه سلمى دى . اصلى ما بتعلمش حتي بعد الى حصل لى فى المرايه لو فاكرين بردو ما حرمتش

 

وصلت الكافيه عشان اقابل سلمى و صديقتها المجهولة الى احساسى بيقول لى انها شايله لى مغامرة  العمر .

وها قد أتت سلمى و صديقتها المجهولة

قعدت سلمى و عرفتنى على صاحبتها و قالت لى

اسلام دى آيه صاحبتى الى حكيت لك عليها فى التليفون

اهلا و سهلا يا ايه

اهلا بيك يا اسلام

بدافع الفضول القاتل المعتاد منى  سالت آيه

ايه بقا الى بيحصل عندك فى البيت يا آيه

آيه انثى  تقريبا عمرها 20 سنه على شكلها كافة علامات التوتر الموجوده فى العالم بالاضافه لرعشه بسيطه فى الاعصاب يعنى شكل اليوم كدة هيبقا جميل

ردت آيه و قالت بيتنا بيحصل فيه حاجت غريبة اوى يا اسلام

هزيت راسى بايحاء منى انها تكمل كلام وانى مش هقاطعها

كملت آيه كلامها وقالت اخويا بيتكلم مع ناس مش موجودين اصلا

فجاة بنلاقيه برق وبيبص لنا بصات تخوفنا

اخوكى مين

انا ليا اخين احمد و مصطفى توأم بس مش شبه بعض

و الى بيحصل ده بيحصل مع مين

بيحصل مع مصطفى

طيب كملى تمام

مصطفى بنلاقيه بيعمل حاجة غريبة زى ما قولت لك بيكلم ناس مش موجودين جسمه بيتصلب و يبقا عصبى و متخشب

بيتكلم باصوات غريبة

قولت لها ما كل ده ممكن يكون عب نفىسى او مرض نفسى

وكان كلمتى دى كانت مش فى وقتها و كانى بردو استفزيت جواها حاجة كانت موجودة معانا لكن مش ظاهرة لنا

فجأة لقيت آيه ملامح وشها اتغيرت وبصت لى بصه عمرى ما هنساها و قالت لى لا مش مرض نفسى مفيش مرض نفسى هيجي ليا و لشيماء اختى و لمصطفى و احمد اخويا و لامى كمان مش كلنا هنشوف خيالات سودة فى البيت مش كلنا هنلاقى الاوض بتتفتح و تتقفل حولينا مش كلنا هنحس بناس عايشين معانا و بردو مش كلنا هنقوم من النوم جسمنا متعور و عليه علامات حرق و نقول فى الاخر ده مرض نفسى

كلام آيه ده خلانى التزمت الصمت لحد ما هى قررت تكمل كلامها

كملت آيه كلامها و قالت احنا بيتنا فى البساتين و من يوم ما نقلنا فى البيت ده و احنا  متعزبين و بنشوف حاجات عمرنا ما تخيلنا اننا نشوفها كلنا و حياتنا اتحولت لجحيم و جبنا بدل الشيخ 3 او 4 او 10 وكل ما شيخ يجى و يقول انا صرفت جن يجى غيره

لحد ما جه شيخ فى الاخر  و قال

الى موجود عندكم فى البيت ده سحر اتعمل لجدتك مامة باباكى و للاسف الى اتاذي بسببه اخوكى مصطفى و بناء عليه  اى شيخ هيجى يصرف جنى السحر هيتجدد و مش هتخلصوا من الى انتوا فيه ده

سالنا الشيخ طيب نعمل ايه

قال من قال لا اعلم فقد افتى العمل عمل ربنا يا بنتى

وسابنا ومشى و لحد انهاردة يا اسلام احنا مش عارفين نعمل اى حاجة وفى عزاب ولما كلمت سلمى  وحكيت لها قالت لى انك انت اكتر حد ممكن يساعدنا

هتقدر تساعدنا فعلا يا اسلام هتقدر تشوف لنا حل ؟

سكت 5 دقايق و رديت على  آيه و قولت لها انا هعمل الى عليا ب انا محتاج انى اجى بيتكم بيت البساتين بتاعكم

قالت لى آيه حاضر  هستاذن بس والدى ووالدتى و ابلغك

قولت لها اكيد طبعا خدى وقتك و قومنا من الكافيه

قومنا و انا دماغى كل الى بيدور فيها بيت البساتين و الحاسة الى بتقول لى انى فى موضوع كبيييييييييييييييييييييييير اوى ورا البيت ده

ربنا يسترها

 

روحت البيت وجهزت لنفسى عشا محترم اوى  و اتعشيت و نمت

وانا نايم كنت سامع صوت عمال يهمس من بعيد اسلام  اوعى تروح البساتين

طبعا كالعادة انا واخد على الحاجات دى بس الى كان غريب المرة دى ان اول مرة الاصوات تقول لى ما تروحش المكان بنفسه

المهم نمت و صحيت تانى يوم وتليفونى رن كانى كنت عارف الرنة دى او مستنى الرنه دى

الو

ايوة مين

انا آيه صاحبة سلمى يا اسلام

اهلا يا اية ازيك عاملة ايه

الحمد لله انا استاذنت بابا و ماما و هما ما عندهمش مانع انك تيجى

طيب تمام يا آيه يناسبكم اجى امتى

اى وقت يريحك

اوكى ان اهاجى لكم كمان ساعة بس انتوا فن بالظبط فى البساتين

قالت لى احنا جمب المقابر

( مقابر ؟ بسال نفسى سؤال اكيد جه فى دماغ كل واحد فيكم دلوقتى )

لسانى اتعقد ثانيتين كدة لحد ما قولت لها اوكى ساعة و هكون عندكم و خدت العنوان بالتفصيل الممل

 

جهزت نفسى و خدت عدتى و نزلت روحت العنوان ووصلت ادام البيت

كان بيت متشطب كويس اوى وشكله جميل بس جميل لدرجه القبح انه رغم جماله الواحد لما يبص له يحس انه مشمئز منه على كل شيلت كل ده جوايا و رنيت جرز الباب   و فتحت لى مامة آيه

سيده فى اواخر  الثلاثينات من عمرها على ما يبدو انها تزوجت فى عمر صغير جدا جدا

رحبت بيا جدا كعادة الشعب المصرى المضياف و قعدت فى الصالون الى لقيت فيه آيه و بنوة تانية توقعت انها شيماء اختها و اتنين ولاد هما دول اكيد احمد و مصطفى و توقعت مين فيهم مصطفى من شكله و من الطريقه الى هو بيتعامل بيها

اول ما قعدت دخلت علينا مامة آيه بالشاى الممتاز الى محدش يقدر يقاومه و مسكت الكوبااية و لسه باخد اول بؤ باب البيت اتفتح و اتقفل بسرعه و النور راح قاطع

يا صلاة النبى بدانا بس بدرى بدرى حتى ما لحقتش اشرب كوباية الشاى

بدات الحاسة السادسه تشتغل عندى بسرعه جدا  لما النور رجع تانى بعد دقيقه و لقيت الكل قاعدين ما عدا مصطفى

لسه هسال و اقول هو مصطفى ف** لقيت  آيه بتققول لى كالعادى اكيد مصطفى فى البدروم

البدروم بيعمل ايه يا آيه

قالت لى ماهو ديما كل ما تحصل الحركة دى نقلب الدنيا عله لحد ما نلاقيه فى البدروم فى الاخر و عمال يكلم فى حاجات غريبة

 

قولت لها آيه تقدرى تورينى البدروم ده وفعلا جه معايا احمد اخوها و هى ونزلونى تحت عند مكان ليه باب حاولت افتح الباب ما بيتفتحش بس وانا برة الباب سمعت اصوات  ناس كتير بتتكلم و صوت مصطفى بيرد عليهم

هما بيقولوا له اقتل عيلتك

وهو يرد و يصرخ و يتعذب و يقول لا مستحيل

قولت لآيه و لاحمد حد فيكم سامع الى انا سمعته و الغريب انهم ما كانوش سامعين كل الى سمعوه صوت مصطفى و هو بيقول لا مستحيل معنى كدة ايه ؟

انا بس الى سمعت ؟

هما عايزينه يقتل امه و ابوه و اخواته ؟

طب ليه انا بس الى سمعت ده ؟ ليه هما كمان ما سمعوش ده ؟

كل الاسئلة دى دارت فى دماغى فى ثانيه لحد ما فجاة

باب البدروم اتفتح لوحدة عالاخر و شوفت مصطفى واقف متخشب  فى مكانه و مش بيتحرك و اعصاب جسمه كلها مشدوده ومبرق منظر بشع من ابشع ما يكون

جريت على مصطفى و سميت بالله  و استعذت من الشيطان الرجيم وحطيت ايدى على مصطفى  جسمه فك ووقع عالارض

شيلته انا و احمد و خرجنا بيه عالصالة برة بتاعة البيت

بس لقيتهم كلهم بيبصوا لى نظرة استغراب

فسالتهم فى ايه يا جماعه ؟

ردت مامة آيه و قالت لى يا ابنى احنا بقالنا فى العذاب ده فترة و بقينا متعودين عليه بس اول مرة  الباب يتفتح  ومصطفى يكون فى الحالة دى و حتى لما الحالة دى بتيجى له و بيتخشب كدة مكنش حد بيقدر يقرب له انت قربت له ولمسته

قولت لهم ممكن اشوف الاوضة بتاعة مصطفى

ردت آيه و قالت لى مبنعرف ندخلها كل ما نيجى ندخلها كول ما هو مش فيها  مبنعرفش ندخلها

قولت لهم مش مشكلة هجرب

فعلا ودونى اوضة مصطفى مسكت الاوكرة بتاعة الباب والغربية الباب اتفتح

دخلت الاوضة والباب اتقفل فجاة ورايا

جريت عالباب احاول افتحه ما اتفتحش مقفول كانه مقفول بالمفتاح

انا كدة اتحبست فى اوضة مصطفى ولوحدى

اه لوحدى وكنت حاسس بقبضه فى قلبى مش بخوف كان الحاسة السادسه بتقول لى انت فى المكان الغلط لكن فى الوقت الصح

اه هو ده التعبير المناسب  و الصحيح للحالة الى انا كنت فعلا فيها انى كنت فى الوقت الصح فى المكان الغلط

 

قررت اواجه نفسى و سميت بالله العظيم فى سرى  و قريت شوية قرآن وقررت اواجه الغرفة  لوحدى

فجاة بدات خيالات تتحرك ادامى فى الاوضه وده كان شئ  طبيعي انه يحصل لكن الى مكنش طبيعي انه يحصل انى الاقى مصطفى فى الاوضة

ايوة لقيت مصطفى فى الاوضة  رغم انى سايبه تحت مغمى عليه

مصطفى كان واقف ادامى و باصص لى بصة انا نفسى اترعبت منها

90 % من الادرينالين الى عمال يجرى جوة جسمي وبيوصل لمخى و يخلى عقلى الباطن يقول لى ان ده اكيد مش مصطفى لان مفيش انسان عنده القدرة انه يخترق حواجز الرؤية بالشكل ده و 10 % بيقولوا لى لا ده وارد وممكن يحصل

كالعاده عملت فيها البطل الهمام  و قولت له ايه يا مصطفى حمد الله على سلامتك انت سبقتنى على هنا يا راجل انا قولت انت اكيد تحت

كنت بتكلم بطريقه الطفل الصغير يقدر يفهم منها انى كداب لكنى تعمدت اعمل ده عشان مصطفى او الكائن ده ايا كان ما يلاحظش انى متوتر

رد عليا مصطفى او الشئ ده و هو بيقول لى  مش قولت لك اوعى تروح بيت البساتين يا اسلام

قالها بنبرة صوت خلتنى فى اشد اشتياقى لانى اجرى

وهنا اتاكدت ان ده مش مصطفى لكن تعمدت انى اخلق شئ نفسي بينه و بينى

رديت عليه و قولت له

ايه يا مصطفى ما اجيش ليه يا معلم انت شكلك  بخيل و مكنتش عايز تكرمنى بواجب الضيافه

رد وقال لى  انا مش مصطفى وانت عارف كويس انى مش مصطفى فبلاش نلف و ندور على بعض

اخرج يا اسلام امشى . وما ترجعش البيت هنا تانى ولو ما خرجتش ما تلومش غير نفسك

اياك تدور ورا الى ملكش فيه واياك تقرب من مدافن البساتين اياك يا اسلام انا بحزرك

 

اخرج يا اسلام اخرج اخرج اخرج اخرج اخرج اخرج اخرج اخرج

وهنا النور قطع تانى

 وجه فى لحظة  ومكنش فى حد معايا فى الاوضة كنت لوحدى

 مدافن ؟ و اخرج و ملومش غير نفسى

فى وسط تفكيرى ده باب الاوضة اتفتح تانى فجاة و دخل عليا احمد و آيه و مامتهم وهما مخضوضين اوى و بيقولوا لى انت كويس

ما ردتش عليهم بس طلب كوباية مية

نزلت معاهم و شربت المية وولعت سيجارة كنت فعلا محتاج انى ادخنها  ومصطفى كان قاعد ادامى فى حالته الطبيعيه جدا ولا كانه كان ادامى من شوية بشكل تانى مختلف

قررت اكسر حاجز الصمت ده و اسالهم  سؤال نفسى ما يتوقعوهوش فميقدروش يكدبوا عشان هيبان لو كدبوا

بس كان فاض اختار الشخص الى انا شاكك انه سبب فى حاجة او اتسبب فى حاجة

الحاسه السادسه قالت لى اجرب شيماء

شيماء كانت هادية هدوء غريب مستفز

فاجئت شيماء بسؤال و قولت لها شيماء انتى ايه الى خلاكى تروحى لحد يساعدك فى انك تعملى سحر

وكانت الصدمه

شيماء ردت

 أ أ أ أ أ أ أ يه س س س حر مين ايه الى بتقوله ده

لعنة الله عليكى لغة جسدك تعترف ببشاعه انك كدابه

قولت لها ما تكدبيش عليا انا عارف

هنا مامتهم قالت لى انت بتقول ايه بنتى مستحيل تعمل كدة

والموقف اتقلب لهرج و مرج

زعقت بصوت عالى سكتوا و رجعت تانى اوجه كلامى لشيماء و قولت لها شيماء ايه الى خلاكى تروحى لحد يساعدك تعملى سحر متعرفيش ان ده كفر

حاولت تنكر لكن باسلوب نفسى معين و بشوية كلام مستفز

بدات شيماء تعيط و تنهار و تقول والله ما كنت اعرف ان هيحصل كل ده انا كنت فاكرة انى كدة هبقا بعمل حاجة كويسة  كنت عايزة اساعد بس

زعقت فى وشها  و قولت لها تساعدى ايه انتى مجنونة عملتى ايه يا شيماء

و امهاو و اخواتها  مقدروش يوقفونى عن الكلام لانهم كانوا فى حالة صدمه فعليه

شيماء قالت لى

انا حسيت ان ماما و بابا بيحبوا اخواتى ومش بيحبونى بيعاملوهم كويس لكن انا لا وبيعملوا لهم كل حاجة لكن انا لا

روحت مكلمة بنت زميلتى قالت لى ان الحل فى واحد بيعمل حاجات عندهم فى المكان و بيته فى حته اسمها ناهيا تقريبا  والراجل ده بيساعد اوى

وفعلا روحنا و الراجل ده عمل لى سحر ان بابا وماما و اخواتى يحبونى و يعاملونى كويس و ما يرفضوليش طلب  بس و الله ما كنت اعرف انها هتوصل لكدة و انهارت فى العياط

 

مامتها و اخواتها فى حالة صدمه لسة هيتكلموا

قولت لها قومى ورينى مكان الدجال ده فين

 

خدتها هى و مامتها و باباها اخيرا ظهر و جه معانا وصلنا عند ناهيا

ايه ده المكان ده مش غريب عليا 

الله البيت ده انا اعرفه

الله ايه ده انا عارف المخزن ده

مخزن الانابيت  ؟

سلم السنترال ؟

مخزن؟

عم

اشباح مخزن عم سلامه ؟؟؟؟؟؟؟؟؟؟؟؟؟؟؟؟؟؟؟؟

قولت لشيماء انتى الى روحتى له ده اسمه ايه قالت لى تقريبا سالم سليم قولت لها سلامة ؟

قالت لى ايوة سلامة

بينى و بين نفسى ازاى ده ده ده مات

قالت لى كان ديما مغطى وشه ومش بيكلمنا

 

الشريط كله عدا ادام عينى تانى

وليد و الاسقاط النجمى و دبور و عم سلامة و الشيطان و اشباح مخزن عم سلامه تانى يا عم سلامة تانى

احنا وصلنا بس مش هعرف اكمل باقى الكلام دلوقتى هرتاح شوية و اكمل لكم حصل ايه تانى لما وصلت عند

عند مخزن عم سلامه للمرة التانيه
الجزء الثانى سيكون فى الردود بعد لحظات


[ندعوك للتسجيل في المنتدى أو التعريف بنفسك لمعاينة هذه الصورة]    إذا تم قتل احد لا تحقق فى الموضوع لأننى القاتل  [ندعوك للتسجيل في المنتدى أو التعريف بنفسك لمعاينة هذه الصورة]




المحقق اكس
_____________________________________________________________________________




EL-Mo7akik


k
avatar
EL-Mo7akik
لص جديد
لص جديد
ذكر
الشخصية المفضلة : كونان إيدوجاوا
عدد المساهمات : 32
المبلغ الخاص بك : 42
البلد :
  :

رد: من اكبر قصص الرعب البيت المسحور الجزء 1.2.3

في الثلاثاء 16 يونيو 2015 - 18:11
الجزء الثانى

عم سلامة ياااااااااااااه للى ما يعرفوش عم  سلامة و مغامرته مع وليد لازم يرجعوا لقصة اشباح مخزن عم سلامة

كنت بحاول اكدب نفسى كتير جدا  فى كل خطوة بنتقدم فيها للمكان وانا عمال اعدى على المخزن و سلم ناهيا و مخزن الانابيب دى نفس الاماكن الى عديت عليها قبل كدة لما جيت اعرف قصة عم سلامة و مخزنه بس اكتر حاجة كانت مريبة اوى ان عم سلامة مات فى حكايته مع وليد

فازاى شيماء اخت آيه  بتقول انها قعدت معاه عشان يعمل لها سحر

عموما يا خبر انهاردة بفلوس بكرة يبقا ببلاش و افهم كل حاجة

دماغى هتنفجر لازم اشرب سيجارة لان فيوزات مخى بدات تقف عن العمل بشكل غير طبيعى بالمرة

نزلنا من عربية والد آيه و ولعت السيجارة وانا عارف انا رايح فين بس سيبت شيماء تقود المسيرة

وبقت شيماء تمشى ادامنا  وهى بتوجهنا للبيت الى فيه الشخص الى عمل لها السحر ده لحد ما وصلنا لبيت عم سلامه

 عارف لما تكون متوقع حاجة بس بردو عمال تكدب نفسك فيها  وتدعى انها تكون غلط و فى الاخر تطلع صح

ده الى حصل معايا  كنت بحاول اكدب نفسى ان هو ده عم سلامة لحد ما فعلا شيماء وصلتنا لبيت عم سلامه و طلعت لحد شقته ووقفت ادام الشقه و قالت و هى بتعيط

هى دى شقة الراجل الى عمل لى السحر

انا طبعا عارف الشقة ددى كويس

بس ازاى

سلامة مات

وانا بنفسى عارف التربة بتاعته فين

بس طول منا فى الحياة دى ما زلت بشوف حاجات تخرق كافة القوانين الى اتربينا و كبرنا و اتعلمناها

 طبعا الموقف ما كانش محتاج تفكير بدات اخبط على شقة عم سلامة و اكيد كلكم عارفين ان محدش رد عليا

هنا والد شيماء قال لها انتى متاكدة يا بنت ان هى دى الشقة

ردت عليه بتوتر و عياط ايوة  و الله يا بابا هى دى الشقه و الله مش بكدب

هنا كان دور المنطق انه ينفى كافه اشكال العقل من الوجود و يلغى شئ اسمه التفكير

وبدون تفكير كسرت باب الشقه بضربه من رجلى

 و طلعت موبايلى نورت الكشاف بتاعه واول باب الشقه اتكسر كان فى كمية تراب رهيبه بتخرج من الشقة و ده كان اكبر دليل ان مفيش حد دخل الشمه دى من يوم ما عم سلامة **********

 

شيماء زهلت و بقت تقول ازاززززاى انا دخلت الشقة دى قبل كدة و بالامارة فيها  ....

قاطعتها و قو لت لها مش مهم يا شيماء وفعلا كان مش مهم لان المصيبه كانت خلاص حصلت

 

 و الحل دلوقتى ؟ ده كان صوت آيه و هى بتسالنى طب الحل ايه هنعمل ايه

قولت لها مفيش حاجة ملهاش حل رغم ان احيانا الحل بيبقا بعيد عن عنينا بس  آجلا او عاجلا بنشوفه

 

طب هنعمل  ايه يا اسلام

هنرجع عالبيت عندكم

البيت هنعمل ايه فى البيت

هتعرفوا لما نروح يالا بيننا

فعلا نزلنا من شقة عم سلامه  و خرجنا من البيت

 

واحنا فى طريقنا للعربية ومعديين من ادام مخزن عم سلامة لمحت حاجة غريبة جدا  لمحت باب المخزن مفتوح على اخره

طلبت منهم  يسبقونى عالعربية

آيه بتقول لى رايح فين

قولت لها  هشوف حاجه و اجى لكم عالعربية

احساسى الى ديما بيراودنى خلانى اطلب من ايه انها مهما سمعت من اصوات ما تجيش لانى عارف كويس اوى مخزن عم سلامه ده وراه ايه و بيعمل ايه

 

وقولت لها آيه مهما سمعتوا محدش يجى لى انا هاجى لكم

مهما سمعنا ازاى يا اسلام

يعنى مهما سمعتوا يا ايه اى حاجة تسمعوها متجوش اسمعى الكلام

 

وفعلا خدت بعضى و قربت من باب المخزن و الغريب ان رعم ان باب المخزن كان مليان خيوط عنكبوت و تراب الا انه كان فعلا  مفتوح

 

 

قلبى كان بيقول لى ان فعلا فى حاجة غريبة جوة المخزن

فتحت باب المخزن كمان شوية و بدات خيوط العنكبوت تتفك وبصيت جوه المخزن

مخزن عم سلامة

ضلمة  فى ضلمة

دخلت خطوتين جوة المخزن

وباب المخزن اتقفل ورايا

كنت كعادتى متوقع هيحصل ايه بس الى حصل  خلف كل توقعاتى

انا كنت متوقع ان صوت يكلمنى او اشوف خيالاات او النور ينور او الاقى نفسى فى مكان تانى زى ما ديما بيحصل معايا

لكن الى حصل انى

لقيت ادامى قبر  وعليه ضريح مكتوب عليه

هنا يرقد سلامة عبد التواب درويش

1952 – 2014

 

ده قبر سلامه يعنى فعلا سلامه مات  امال شيماء راحت لمين

وباب المخزن او الى اصبح باب تربة اتفتح لى ليه مخصوص

انت بتعمل هنا ايه

الصوت ده جالى من ورايا خلانى حسيت برعب الدنيا كله فوق دماغى  

لفيت لقيت شخص واقف و بيقول لى انت ايه الى دخلك هنا الباب ده كان مقفول يا اخى الميت ليه حرمه

قولت له متاسف انا كنت معدى و قولت ادخل اقرا الفاتحه

قال لى فاتحة ايه اتفضل برة لو سمحت برة

طلعت برة ووانا طالع لمحت بعينى ورقة عالارض شكلها مستفز اوى للى يبص عليها

ورقة كانها ورقة م كتاب تاريخى ما اعرفش ايه الى خلانى وطيت كانى بربط رباط الشوز بتاعى  و خدت الورقة طبقتها و خرجت من المخزن و خرج ورايا الشخص ده وقفل المخزن

 

و خدت بعضى وروحت عالعربية كانوا مستنيينى

ايه سالتنى فى ايه ما سمعناش حاجة يعنى فى ايه

قولت لها مفيش يالا نتحرك من هنا

ركبنا العربية وطلعت الورقة من جيبى لقيت مكتوب عليها

احزر يا من تدخل الان فلكل سطان خدم و لكل انسان قرين و السحر مفعوله بطئ ولكن مفعول الشر اكبر

 

ما فهمتش اى حاجة من الورقه دى فطبقتها  وحطيتها فى جيبى تانى

 

وصلنا بيت آيه و دخلنا 

قولت لهم انا  ممكن ازازة مية كبيرة متكونش سقعه

وفعلا جابولى ازازة مية  طلبت مصحف  و فتحت على سورة البقره

وبدات  اقرأ سورة البقره على المية

واول ما خلصت طلبت من مامة آيه انها تعمل من المية دى عصير او شاى ليهم كلهم

وفعلا  ده حصل و مامة آيه عملت العصير

وشربوه

ومن هنا بدات كل حاجة توضح

 

جات لهم حالة غريبة جدا بمجرد ما شربوا العصير الى معمول بمية مرى عليها سورة البقرة

بدأت ملامح وشهم تتغير وبدأوا يضحكوا ضحك هستيرى باصوات انا واثق بنسبة 100 % ان هى مش اصواتهم

بدات انوار البيت تنور و تطفى بشكل غريب و بدات انا بنفسى اشوف خيالات غريبة

وبقيت لوحدى فى مواجهة كاملة مع مجموعه من الجان الى محاوطين المكان

بس كنت واثق ان المواجهة دى مش وقتها لانى مش جاهز لها او بمعنى اصح مش هينفع اقوم بالمواجهة دى لوحدى

5 دقايق و رجع الوضع كله لطبيعته تانى و بقا مفيش اى حاجة  و هما رجعوا لطبيعتهم و الغريب بردو انهم لما رجعوا لطبيعتهم ما كانوش فاكرين اى حاجة  حصلت فى ال 5 دقايق الى فاتوا و كانهم كانوا فى غيبوبة زمنية مؤقته

 

كعادة اى بيت مصرى بيفصل بين مشاكله و بين اى حاجة تانيه

بدأت والدة آيه تجهز الغدا اكراما للضيف الى هو انا وبقيت قاعد انا و مصطفى و احمد و والدهم

كان  كل الى مسيطر على تفكيرى الحل ازاى اساعد الناس دى  وايه الى خلا شيماء تلجا للسحر و ازاى عم سلامة بعد ما مات ظهر و ظهر باللذات لحد انا جه يوم من الايام و اتعاملت معاه هل ى صدفه

هل اصلا عم سلامة ما رجعش وده مجرد تشابه اسماء بس ازاى دى البنت نفسها راحت و قالت ان هى دى شقته

لا الموضوع كبير و فى حلقة مفقوده

طلعت الورقة الى لقتها ادام قبر عم سلامة و قريت الكلمة تانى فى سرى

احزر يا من تدخل الان فلكل سطان خدم و لكل انسان قرين و السحر مفعوله بطئ ولكن مفعول الشر اكبر

احزر يا من تدخل الان فلكل سطان خدم و لكل انسان قرين و السحر مفعوله بطئ ولكن مفعول الشر اكبر

احزر يا من تدخل الان فلكل سطان خدم و لكل انسان قرين و السحر مفعوله بطئ ولكن مفعول الشر اكبر

احزر يا من تدخل الان فلكل سطان خدم و لكل انسان قرين و السحر مفعوله بطئ ولكن مفعول الشر اكبر

 قريتها كتير جدا لدرجة انى حفظتها

وبردو مش عارف اوصل لحاجه

فى حاجة غلط و فى حاجة مش مفهومة  فى وسط كل ده .. نور البيت كله اتقطع و سمعنا صوت صرخة  جاية من ناحية المطبخ و من سمعى للصرخة . الصرخة دى صرخة شيماء

 ولعت كشاف موبايلى و بدانا نسترشد الطريق للمطبخ لحد ما وصلنا لقينا شيماء واقعه على الارض فى حالة اغماء و اعياء شديدة ومامتها و آيه واقفين حوليها فى حالة زهول

 

بدات شيماء تتشنج و تتعصب و تعمل حركات بجسمها لحد ما بصتلى وبرقت و ابتسمت ابتسامه سخرية و اتكلمت بصوت مش صوتها و قالت

جاى ليه يا اسلام

تماسكت و ابتسمت نفس الابتسامه و قولت

جاى عشان احل الى بيحصل هنا

وتفتكر انك ممكن تحل حاجة

مش انا الى بحل ربنا هو الى بيحل كل حاجة

انت ضعيف يا اسلام  مش هتعرف تحل حاجة

مين قال لك كدة ربنا وحده قادر على كل شئ انت الى ضعيف و رخو والقرآن وحده كفيل بانه يخليك تتعذب انت و الى معاك

لما انت قوى كدة يا اسلام ما انقذتش فاطمه ليه وهى بتموت ادامك . اتخليت ليه عن صفاء و ماتت و هى بعيد عنك

( تبا لك بتلعب دلوقتى على نفسيتى  و على مشاعرى و على اسرار حياتى الى هى نقط ضعفى لا انا هتماسك بردو )

قولت له كل ده قضاء من عند ربنا و ابتلاءات انما انت  الى هتموت و هتموت شر موتة يا ضعيف

وبدات اقرا فى ايات من القرآن للسحر و الجن

والنور رجع

بس لما النور رجع الموقف ما اختلفش لانى بصيت ورا شيماء لقيت مصطفى واقف و فى ايده سكينه

وبيقرب بيها ناحية احمد اخوه

قولت لاحمد خد بالك

احمد بص وراه لقى مصطفى ماسك السكينه و بيقرب عليه

سيبت شيماء و قومت انقذ احمد من الى هيتعرض له لانى عارف كويس ان الجن عايز مصطفى يقتل اخواته و اهله

مسكت ايد مصطفى و شيلت منها السكينه و انا بقرا القرآن مصطفى وقع على الارض كالعادة

وبدات اصوات ضحك تطلع من الشئ الى جوة جسم شيماء و تطلع و تعلى اكتر و اكتر

لحد ما الضحك سكت و شيماء بصت ناحيتى و نفس الصوت قال لى

هتخسر يا اسلام ما تدخلش فى الى ملكش فيه انا قولت لك اوعى تيجى البساتين و انت بقا الى فضولك جابك تانى

قولت له انت مين انت يعنى عشان تقول لى اجى ولا ما اجيش

قال لى انا انا حبيبك

حبيبى مين انا ما اعرفكش

لا تعرفنى كويس

اعرفك منين

انت زورتنى قبل كدة

زورتك فين انت عايز ايه

زورتنى فى قبرى و انا كل الى عايزه انى البى رغبة الامورة الى جتلى بتطلب المساعده

قبرك ؟ انت مين

انا الى انت خوفت انى اكون موجود

انا هاهاهاهاهاهاها

انا عم سلامة

وسكت الصوت و كان الذهول مسيطر على المكان

آيه و مامتها و باباها فى حالة صدمه من الى شافوه و سمعوه

وانا فى حالة اعياء من قلة فهم الموقف

رجعت شيماء لطبيعتها وبدات تتكلم و تقول

 اسلام انت لازم تمشى هو قال لى اقول لك كدة امشى لانك لو ما مشيتش هيقتلنا واحد واحد

قال لى انك وجودك هنا غلط امشى ارجوك

قولت لها مش همشى هو الى هيمشى

قالت لى يبقا كلنا هنموت  يا اسلام كلنا هنموت  و اغمى عليها

قومناها هى و مصطفى و قعدناهم فى الصالة لحد ما يفوقوا و انا قررت انى انهى المهزله دى حتى لو حياتى هتروح انما لازم انهيها باى شكل كان لان واضح ان سلامة هو الى عمل كل ده عشان يجيبنى اواجهه فى معركة نفسيه هو عنده ثقه انه هيكسبها لكن باذن الرحمن انا الى هكسبها

ولان الموقف مش سهل  طلبت من والدة ووالد آيه و احمد انهم يجيبوا لى كشافات  و مصحف و قررت انى اقلب السحر على الساحر

ويا انا يا انت يا عم سلامة

 

طلبت منهم انى اصلى قبل ما نعمل اى حاجة  و فعلا سمحوالى بانى اصلى و صليت و دعيت ربنا يقوينى على الى انا داخل عليه

وججينا فى الصالة وخلتهم ضلموا انوار البيت و شغلوا الكشافات بس و كل واحد كان ماسك مصحف فى ايده

وقولت لهم لو حد فى جوه قلبه زره خوف يخرج من البيت لان ده مش هيكون كويس

والغريب بردو ان كلهم تملكتهم الشجاعه

قعدنا كلنا جمب بعض و بدانا نقرا سورة البقرة باعلى صوت عندنا و بدات احس بحاجات بتعدى من جمبى و بخيالات بتعدى ادام نور الكشفات

وبضحكات غريبة بتيجى من حولينا

بعيون بتبص علينا من قلب الضلمة

فضلنا نقرا بصوت اعلى و اعلى و اعلى لحد ما خلصنا سورة البقرة

وفجاة اتعدلت شيماء فى قعدتها و قعدت ادامى و بصت لى و قالت لى بنفس الصوت الى كلمنى قبل كدة

مش قولت لك بلاش

بلاش ايه انا الى المرة دى طالب المواجهة

هتخسر يا اسلام

مش مشكلة انى اخسر على الاقل انا شجاع بتعامل وش لوش انما انت جبان بتشتغل بالاسحار يا قذر

حاسب على كلامك معايا عشان ما ائذيكش

انت متعرفش تاذينى لان قضائ و قدرى فى ايد ربنا

لا اقدر ائذيك

ما تقدرش و احب اقول لك انك كمان هتقول لى السحر الى عملته ده وديته فين

ضحك بصوت هستيرى و قال لى بقا انت عايز عم سلامة يقول لك ودا السحر فين انت مجنون

لا انت الى مجنون انك تفكر انك اقوى من ربنا مجنون لو تفكر انك تقدر تاذي حد ضد رغبه ربنا

هتموت يا اسلام

مش مشكلة انى اموت بس هبقا عارف انا مت ليه

انطق مودي السحر فين

وهوبيضحك ضحك هستيرى

قريت من القرآن اكتر اكتر لحد ما بدات اقرا ايه الكرسى

اعوذ بالله من الشيطان الرجيم  . بسم الله الرحمن الرحيم  ( الله لا اله الا هو الحى القيوم لا تاخذه سنة ولا نوم له ما فى السموات و ما فى الارض من ذا الذى يشفع عنده الا باذنه يعلم ما بين ايديهم وما خلفهم ولا يحيطون بشئ من علمه الا بما شائ وسع كرسيه السكوات و الارض ولا يؤؤده حفظها و هو العلى العظيم )

وكررت و هو العلى العظيم اكتر من 12 مرة

وبدء عم سلامة يصرخ و يقول لى انت عايز ايه عايز ايه

قولت له انطق السحر الى عملته وديته فين انطق

بدات احس فيه بانه بيتعذب من ايه الكرسى سبحانك ربى

قال لى خلاص هقول لك هقول لك كفايه . هحكى كل حاجة

قولت له انطق و قول

قال لى  البنت دى جت عن طريق حد تعرفه ادام التربة عندى ادام القبر بتاعى و الناس فاكرين ان قبرى عنده كرامات و بدات تقول انها زهقانه نم اهلها و عايزة عمل لهم حاجة يحبوها بيها

سخرت لها حد من الجن على انه ساحر يساعدها  و يعمل لها سحر

انطق السحر الى عملته لها لايه اتكلم

عملت لها سحر سفلى  . سحر بالتفرقة  و العذاب ووقف الحال عمرهم ما هيشوفوا يوم حلو ابدا وبدء يضحك

رجعت اقرا تانى ايه الكرسى بدء يبطل ضحك و يقول كفايه كفايه خلاص

انطق والسحر ده يا كافر وديته فين

هقول لك وديته فين هقول

فين

فجاة سكت وبص لى اوى وقرب بجسمه ممنى و قال لى السحر موجود جوة قبرى يا اسلام 

والصمت هب على المكان وشيماء اتشنجت و رجعت لحالتها الطبيعيه

 

السحر قوة قبرك يعنى تانى هروح لك قبرك يا سلامة لا و المرة دى لازم انزل قبرك عشان اشوف السحر ده

لعن الله كل كافر مفسد فى الارض

فاق  مصطفى و فاقت شيماء . وسالونى هتعمل ايه يا اسلام

سكت شوية قبل ما ارد عليهم و اقول لهم هروح هروح قبر سلامة عشان اشوف السحر الى هناك

هروح عشان احنا اقوى من السحر مش السحر الى اقوى مننا و طول ما ربنا معانا مش هيخذلنا

هنيجي معاك

ده كان كلامهم لما قرروا انهم يرافقونى فى رحلتى لقبر عمر سلامه عشان نشوف السحر المعمول لهم

 

نلتقى فى الجزء الثالث من منزل البساتين المسحور


[ندعوك للتسجيل في المنتدى أو التعريف بنفسك لمعاينة هذه الصورة]    إذا تم قتل احد لا تحقق فى الموضوع لأننى القاتل  [ندعوك للتسجيل في المنتدى أو التعريف بنفسك لمعاينة هذه الصورة]




المحقق اكس
_____________________________________________________________________________




EL-Mo7akik


k
avatar
EL-Mo7akik
لص جديد
لص جديد
ذكر
الشخصية المفضلة : كونان إيدوجاوا
عدد المساهمات : 32
المبلغ الخاص بك : 42
البلد :
  :

رد: من اكبر قصص الرعب البيت المسحور الجزء 1.2.3

في الثلاثاء 16 يونيو 2015 - 18:14
الجزء الثالث
نزلنا كلنا من البيت من منزل البساتين و اتوجهنا لقبر عم سلامة


واحنا فى الطريق كان الشئ المسيطر عليا هو ان الموضوع قلب بالنسبة لى عند فى عند

يا انا يا سلامه

وهقضى عليه ح-تى لو فيها موتى

خلاص اغلب الاسرار انكشفت ادامى

عرفت مين الى راح فى طريق السحر

ومين الى عمل السحر

ومين الى اتضر ن السحر

و هينقلب السحر على الساحر و الهم ده هيروح

واحنا ماشيين فى الطريق كان المصت مخيم على الاجواء كلهم ساكتين و مش عارفين ايه الى هيحصل بس كان بردو همهم نفس همى ان الموضوع ده ينتهى و يخلص للابد



إسلام انت ناوى تعمل ايه هناك بالظبط

آيه كانت بتسالنى

ولا حاجة ناوى انزل القبر

تنزل القبر ازاى

هنزل زى الناس عشان اشوف السحر الى معمول فى القبر ده و نفسده و ينتهى الهم ده كله

انت متاكد من الى بتقوله ده انت ما تضمنش هيحصل ايه هناك ولا هنلاقى مين

رديت بنرفزة غير مبررة

انا ما طلبتش من حد يجى معايا ومحدش ينزل معايا القبر انا هنزل لوحدى

ما ردتش اية عليا يمكن تقديرا منها للحالة الى كلنا كنا فيها او بمعنى اصح للحالة الى انا باللذات كنت فيها



وصلنا منطقه ناهيا و كانت الساعه 2 ونص بعد نص الليل قمة الصمت

الصمت القاتل الى يخلى اى شخص يفكرالف مرة قبل ما يخطو اى خطوة

اتحركنا وطلبت منهم يستنونى بس اصريت انى اخد شيماء و مصطفى معايا

وده كان لسبب

طبعا سالونى اشمعنى

قولت لهم لان هما دول اكتر اتنين مضرورين بالسحر

روحت عند باب المخزن مخزن عم سلامة او الى اصبح قبر عم سلامة و انا متوقع انى هلاقيه مقفول

لكن الى حصل انى لقيته مفتوح زى المرة الى فاتت

بدات اقرأ قرآن وانا بفتح الباب كمان شوية

ودخلت ان او شيماء و مصطفى وانا الى بايدى قفلت الباب



نورت انوار الكشافات الى كانت معانا و قولت لشيماء و مصطفى

ايا كان الى هيحصل هنا ما تفتحوش عنيكم كل الى عايزه منكم تقرأوا فى سركة ايه الكرسى و تكرروا وهو العلى العظيم كتير



وقعلا قعد مصطفى و شيماء و غمضوا عنيهم

وانا بدات فى رحلتى لفتح قبر عم سلامة

قربت من القبر كان مقفول بشكل غريب وملوش مكان معين يتفتح منه

ومش لاقى مدخل افتحه منه مسكت حديدة كانت معايا و بدات اخبط بيها على امل انى اكسر الباب بردو ما اتكسرش

معرفش ايه الى جاب فى دماغى ساعتها الورقة الى لقتها المرة الى فاتت لما كنت هنا و طلعتها من جيبى و قريتها قولت يمكن توصلنى لحاجة

احزر يا من تدخل الان فلكل سطان خدم و لكل انسان قرين و السحر مفعوله بطئ ولكن مفعول الشر اكبر

قلبت الورقة وكنت اول مرة اقلبها لقيت على ضهرها مكتوب

جمل معينه كنت على يقين انها جمل سحرية

مش هكتبها لانها لها اضرار لكن الغريب انى لما قريت الجمل الغريبة دى

القبر فتح

والاغرب انه لما فتح ما كانش فيه جثمان عم سلامة

القبر كان فاضى

فاضى من اى شئ الا من كيس اسود ليه رائحه نتنه

مسكت الكيس وانا فى قمة حالات اشمئزازى و فتحته لقيت جواه جمجمة عليها دم و مرشوش عليها حاجات بالنسبة لنا عاملة زى الفلفل و الملح رغم انى كنت واثق انها ولا فلفل ولا ملح

بدون تردد فرست الحاجات دى عالارض و طلبت من مصطفى و شيماء و هما مغمضين عنيهم يبتدوا يقراوا اية الكرسى



بدات حاجات كتير تتغير من حوليا لما لقيت نفس الخيالات بتيجى تانى ادامى

فضلت اقرا قرآن بعد ما طلعت مية و ملح كنت خدتهم من بيت آيه عشان ارشهم على الجمجمه و على الحاجات الى جوة الكيس عشان افسد السحر

وهنا نور المخزن كله نور

بس ما كانش نور

كانت نار

نار بتزيد لحظة بلحظه

وبتاكل اى حاجة فى طريقها و بتقرب



وانا عمال اقرا قرىن اكتر و اكتر و اقول اعوذ بكلمات الله التامات من شر ما خلق

يارب انت الى عالم بالى بيحصل ساعدنى مليش غيرك

وفججاة النار وقفت و اتشكلت على شكل انسان مش باين ملامح لكن الجسم كله من نار

وقرب ناحيه مصطف و شيماء وبدء يوطى ناحيتهم

صرخت بعلو ما عندى و قولت اوعوا تفتحوا

ما تفتحيش عينك يا شيماء

اوعى تفتح عينك يا مصطفى اوعى



ما عرفش يقرب منهم

ووقف ادامى و بدء يظهر منه صوت شبيه بنفس الصوت الى كان بيكلمنى لما كانت شيماء فى حالة اللاوعى

ومقالش غير كلمة واحدة

انت ضعيف يا اسلام ضعيف ضعيف ضعيف

قريت قرآن اكتر واكتر و اكتر



وبدات اعلى صوتى فى القرآن

وبعزم ما عندى رشيت على النار دى المية الى كانت معايا الى انا قرأت عليها قرآن قبل كدة و بدء يصرخ

وصرخاته تعلى

وتعلى و تعلى اكتر



وانطفت النار

ورجع المخزن ضلمة من تانى

وقعت على الارض فى حالة اعياء قوية

اتحركت ببطء ناحية القبر لقيت فيه جثمان عم سلامة

رجع الجثمان مكانه رغم انه مكانش موجود لما فتحته

بثيت على الجمجمة و الكيس الاسو د لقيتهم سايحين و متحولين لتراب

الف حمد و الف شكر السحر انتهى



بصيت على شيماء و مصطفى لقتهم واقعين على الارض مغما عليهم



فوقت مصطفى وكان لاول مرة يقوم يرد عليا بطريقة انسان عادى

خليته شال اخته و خرجنا من المخزن او من القبر

واول ما خرجنا من القبر القبر كله اتحول لبقعه نار

وبقا بيخرج منه اصوات و صرخات كتير



سندت مصطفى و اخته و رجعنا ناحية العربية و بقينا نشوف منظر القبر و هو والع والدخان واصل للسما



نزل اهالى المنطقع على النار و حاولوا يطفوها ما عرفوش

وما مشتيش انا و اهل آيه الا لما اتاكدنا ان المكان اتحول لكوم تراب



انتهى السحر و انتهى عم سلامة للابد و رجعت حياة آيه و اخواتها طبيعيه و كانت حياتهم سعيده



فى يوم كلمتهم اطمنت عليهم و بعد ما قفلت معاهم ببص ادامى

لقيت مكتوب على الحيطه بتاعة اوضتى

هنا يرقد سلامه عبد التواب درويش

1952-2014

انتهت القصه و اشوفكم فى قصة اخرى او مغامرة اخرى من مغامراتى مع عالم الما ورائيات


[ندعوك للتسجيل في المنتدى أو التعريف بنفسك لمعاينة هذه الصورة]    إذا تم قتل احد لا تحقق فى الموضوع لأننى القاتل  [ندعوك للتسجيل في المنتدى أو التعريف بنفسك لمعاينة هذه الصورة]




المحقق اكس
_____________________________________________________________________________




EL-Mo7akik


k
استعرض الموضوع السابقالرجوع الى أعلى الصفحةاستعرض الموضوع التالي
صلاحيات هذا المنتدى:
لاتستطيع الرد على المواضيع في هذا المنتدى